كتاب لابد من خيانة – عمر طاهر

زي رغبتك فى المشي لوحدك على أطول كوبرى
زي رغبتك فى ممارسة الجنس مع اخر سيجارة فى الليل
زي صوتك اللى جاي من كورَس ورا فيروز
زي صمتك الإضطراري اثناء النوم
زي هروبك للهوامش
واختيار خلفية موسيقية مناسبة لإنهيارك
زي ماتش طاولة مجروح
زي دعوة -تحت جلدك- لشخصين
لحفلة اسطورية فى سينما اتحولت لمصنع جثث
زي مفاجآت الليل العادية
وزي حجج الفراق الكلاسيكية
إحساسك كان صحيح
لابد من خيانة

-2-
مرواح

في كل شارع
واحد بيعدي آخر الليل
سيجارته ثابته فى بقه
وايديه فى جيوبه
والدخان بيخرج من صدره
يدخل عينيه .. فتتملي بالدموع
في كل شارع
ناس بتصحى بدري قبل طلوع الشمس
تضرب كف بكف
وهي بتتأمل جثة الشاب الغريب
اللى مات غرقان فى الدموع